2018 jylǵy 8 tamyzda QR Ulttyq mýzeıinde HH ǵasyrdyń eń tanymal jáne bedeldi sheberleriniń biri – Pablo Pıkassonyń biregeı kórmesi ashyldy.
Qazaqstan Respýblıkasy Mádenıet jáne sport mınıstrligi uıymdastyrǵan «Pablo Pıkasso. Vollorıstik Selestına men keramıka» ekspozısıasy Astananyń 20-jyldyǵyna oraı ótkizildi.
Kórmeniń ashylý saltanatynda sóz alǵan QR Mádenıet jáne sport mınıstri Arystanbek Muhamedıuly: «Astana qalasynyń 20 jyldyǵyna oraı arnaıy uıymdastyrylǵan «Pablo Pıkasso «Selestına jáne Valorıstyq keramıka» halyqaralyq kórmesi – shoqtyǵy bıik mádenı sharalardyń biri. Ulttyq mýzeıdiń ashylǵanyna az ǵana jyldar bolsa da, osyndaı dúnıejúzine belgili tulǵalardyń kórmesin osy jerden kórip jatyrmyz. Ol biz úshin úlken qýanysh. Pablo Pıkasso – tek sýret óneriniń ǵana emes, sonymen qatar, búkil tirshilik kóshiniń, jalpy adamzattyń damýyna úlken úles qosqan tulǵa. Myna ǵajaıyp álemniń sulýlyǵyn qylqalammen qaǵaz betine túsirip, oǵan erekshe ár bere bilý ekiniń qolynan keletin is emes. Sýret óneri – tabıǵat tartý etken talantty jandarǵa tıesili desek, Pablo Pıkasso sondaı talant ıesi», – dedi.
Kórme barysynda qala qonaqtary men turǵyndary kórkem keramıka men Pıkasso gravúralarynyń sırek kórsetiletin koleksıasyn tamashalaýǵa múmkindik aldy. Qumyralar, tabaqshalar, saýyttar, ertegidegi qustar men mıftik jaratylystar – uly sheber Ekinshi dúnıejúzilik soǵystan keıin turaqtaǵan Fransıanyń ońtústiginiń ǵalamat shýaqty peızajdaryndaı kóz tartady.
Italıanyń Qazaqstandaǵy elshisi Paskýal D,Avıno: «Búgingi sharanyń uıymdastyrylýy men úshin úlken qýanysh. Osyndaı mádenı sharalar túrli ulttardyń bir arnada toǵysyp, ózara tildesýine, túsinisýine sebep ekeni anyq. Ulttyq mýzeıge qoıylǵan búgingi kórmeniń mańyzy zor. Álemge áıgili Pablo Pıkassonyń jeke kórmesi Qazaqstanda tuńǵysh ret uıymdastyrylyp otyr. Kórkem týyndylar kóptiń kóńilinen shyǵyp, mýzeı qonaqtaryn qýantady dep úmittenemiz», - dedi.
1946 jyly Vollorıste jyl saıyn ótetin keramıka kórmesine barǵan Pablo Pıkasso, sol jerden shabyt alyp, tórt myńnan asa dekoratıvti keramıkalyq forma jasaǵan. Pablo Pıkasso tanys zattardyń ýtalıtarlyǵyn biregeılik, daralyq pen kórkem týyndynyń sıqyrlyǵymen biriktire aldy. Sheber kózeshi sharyǵyn paıdalanbaǵan. Onyń saýyttary men keseleri óziniń ádeıilep jasalǵan formalarynyń arqasynda ádemi, tutas jáne tylsym hám tartymdy arhaıkalyq músin ónerin eske túsiredi. Osy kóztartarlyq, minsiz pishinderge oı júgirtip qarasaq, ǵajaıyp qustar men ańdardyń tirilip, al túr-tússiz keramıkadan jasalǵan músinderge jan bitip, adam keıipine enetinin elestetemiz, ádettegi qarapaıym obrazdar qaıtalanbas tutas tarıh retinde kóz aldymyzǵa keledi.
Pıkassonyń bul jumystary – avtorlyq keramıkanyń alǵashqy tájirıbesi emes. Vollorıstik keramıkanyń besigi – «Madýra» keramıkalyq sheberhanasy áli kúnge deıin bar.
Madýra sheberhanasynyń buıymdaryn satyp alatyn kolleksıonerlerdiń týyndylarynda mindetti túrde Edition Picasso («Pıkosso qolynan shyqqan») jazýy men nómiri bar. Bul kórmege 32 túpnusqa eksponat usynyldy, olarǵa da joǵaryda atalǵan belgiler qoıylǵan.
Kórme 2018 jylǵy 3 qarashaǵa deıin jalǵasady.
